خليك دايما صاحب اللعبة الحلوة

7 خطوات تزود مبيعاتك بشكل كبير

Ostoria
Ostoria

7 خطوات تزود مبيعاتك بشكل كبير

انت كصاحب بيزنس او موقع الكتروني … هيهمك طبعا انك تزود نسبه مبيعاتك بشكل مستمر

مش هتكلم كتير واقولك حاجات تقليدية

هختصر ليك موضوع واقولك على 7 نقاط محتاج تركز عليهم عشان على الاقل تقدر تحافظ على معدل نمو مبيعاتك..

1- Be Proactive .. كن سباق

Related imageيعني ايه اكون سباق !! انك تكون الاول في كل حاجة .. خليك سباق في عرض منتجاتك، سباق في تحسين الخدمة اللى بتقدمها، سباق في اعلانك وافكارك الجديدة، سباق في عروضك، وإنك تكون الاول دي مش حاجة سهلة ابدا ، وإنك تحافظ على مكانتك الاولى ده محتاج منك مراقبة وأدراك بالتغييرات اللي بتحصل كل يوم في البيزنس ، وعلى قد ما هتكون سباق على قد ما هتستحوذ على نسبة اكبر من الفئة اللي بتستهدفها.

2- حدد إنت بتكلم مين “بالظبط”

لأن دايما السهل أنك تعمل أعلان واحد تكلم بيه كل الناس في الأغلب مبتجبش نتيجة .. خلينا نفترض أنك مثلا (مطعم) أكيد الفئة اللي بتجيلك عشان بتحب الحوادق مختلفة نوعا ما عن اللي بتجيلك عشان بتحب الحلويات .. طيب اذا انت عملت اعلان كبير على واجهة المطعم وكتبت عليها (نقدم اشهى الأكلات) مش هتبقى عملت اي فرق .. بس اذا استعملت نفس مساحة الواجهة دي وقسمتها نصين ، وخليت نص لصورة بيتزا بتشد منها مثلث وجبنة بتمط كده لفوق (مشهد تقليدي مش محدد) والنص التاني حطيت صورة لطبق كيك سايحة عليها نوتيلا مثلا .. صدقني النتائج هتختلف معاك

قيس بقى كل ده على اعلاناتك اللي في الشارع او السوشيال ميديا او ايا كان اعلاناتك فين .. المبدأ واحد.. حدد (فئة) معينة واستهدفها .. هتفرق جدا.

3- Personalize your approach .. تعامل مع عملائك كالاصدقاء

النقط دي بالذات على السوشيال ميديا.. بعد ما تحدد انت بتكلم مين بالضبط ، حاول تتعامل معاه بمنهجية إنسانية مش تكنولوجية.. الفيسبوك والبيدج والاعلانات والايك والكومنت كل دول ادوات .. اللعبة والمكسب بقى هي في طريقة تشخيصك للأدوات دي ، يعني انا عميل ليك كل ما احس انك بتكلمني “أنا” ، كل ما ال “أنا” اللي جوايا هتفضلك عن غيرك لا إرادايا ، لكن الردود اللى تحس انها خارجه من “Bot” متسجل عليه ردود محفوظة دي مبتأكلش عيش ولا بتحافظ على عميل ولا حتى بتعمل مبيعات .. خليك بدماغك يعني.

4- أهتم بالمشاعر .. وبعدها المنطق

Related imageاحنا بشر .. بنمشي ورا مشاعرنا اكتر من حسابات المنطق ، ممكن بنقيس حسابات المنطق لما نكون ناضجين، والنضج ده قصة تانية في حد ذاته مش مجال اننا نتكلم عنه هنا .. بس ببساطة إنت هتحب اللى يبتسم في وشك الصبح اكتر من اللى هيعد يشرحلك فوائد الابتسامه لو ابتسمت .. الموضوع واحد في الحالتيين لكن زي ما قولنا اللعبة في الطريقة .. حاول تربط منتاجاتك بعاطفة اكتر عند عملائك فرحة ، انتصار ، سعادة ، تميز وغيره كتير… لان كل ما تكون الرسالة فيها جزء عاطفي كل ما بتقرب اكتر ،  مش معني كده إنك كل رسايلك لعملائك تبقي بالحب  .. الموضوع محتاج sense بس .

5- وفر تفاصيل مُنتجك بدقة

ما تتوقعش إن في معلومات معينة “بديهية” من وجهة نظرك لازم نكون كلنا عارفينها ، ولكن إتعامل مع منتجك علي إنه شئ “غير معرف” للبني آدمين ، وعرّفـه إنت بطريقتك ، بالتفاصيل اللي تساعد العميل علي إنه ياخد قرار بالشراء .. الفيسبوك لما عمل تعديل وضاف Tab الـ Shop للبيدج كان عشان يساعدك إنك تعرّف عملائك أكتر عن منتجاتك وكأنهم في معرضك أو عيادتك الـ 24/7 …

6- Focus on customer benefits التركيز على مزايا العملاء

Image result for Focus on customerدلوقتي انت صاحب بيزنس لو ملابس مثلا ، اكييد هاتبيع هدوم ، السؤال بقى .. ايه الفوايد اللى ممكن استفيدها لما اشتري منك انت بالذات ! هتقولي هديك خصم ؟؟ احب اقولك مصر كلها مبتعملش حاجة في السنة اللى فاتت غير انها تعمل خصومات ، عادي مستفدتش منك برضو ،، وانت هنا كصاحب بيزنس عاوز تستمر وتبيع، لازم تلاقي فوايد تانية ليا انا كعميل عشان اشتري منك ، زي مثلا: إنك تعملي خصم زيادة لو رشحتلك حد من صحابي ، زي لو حبيت ارجع او أبدل حاجة هتتعامل معايا بساسية الحفاظ على الزبون مش بسياسة الإستبدال والإسترجاع ، في تفاصيل كتير بسيطة ممكن تحولها لفوايد تخلي عميل يشتري منك والاهم بكتييير انه يكرر عملية شراء بشكل دوري .. وفي عالم السوشيال ميديا .. المعلومة في حد ذاتها ممكن تكون من ضمن الفوائد ، لو بتملكها فعلا وتعرف توصلها لـعملائك …

7- اعمل اعلان لمنتج واحد في نفس الوقت .

مش منطقي ابدا طبعا انك متعملش اعلانات ، بالعكس ، الإعلانات صحية جدا بسسس .. لو بتتعمل صح .

انت مثلا لو بتبيع اربع منتجات مع بعض ، مش لازم تعلن عن الاربع منتجات مع بعض او ورا بعض ،إنت لو عملت لكل منتج فيهم بداية ونهاية وإستراتيجية ، وإديتها حقها جدااا ، بعد وقت معين هاتبقي بتبيع الـ4ـ منتجات ، بالتوازي ، وممكن من غير ما تعمل إعلانات أساسا

عمرك شوفت كوكاكولا مثلا نازلة بحملتين إعلانات مع بعض واحدة للـ لتر والتانية للكانز !؟

أو مثلا سامسونج عمرك شوفتها نزلت منتجين مع بعض لنفس الشريحة المستهدفة !؟

متهيألي .. صعبة .. واردة .. لكن صعبة ، عشان كده خليك في الطريقة اللي تضمنلك ميزانيتك وتوصل بيك للعملاء الحقيقيين اللي هايستفيدوا منك بجد .

الخلاصة..

البيع مش سحر ولا هو سر ولا صعب او سهل ، البيع لعبة . واللعبة فيها تكتيك واداء وخبرة .. خليك دايما صاحب ” اللعبة الحلوة “