خطة الترويج المتكاملة

خطة الترويج المتكاملة . يا ترى ايه اللي حصل عشان يتغير مصطلح الترويج للاتصالات التسويقية المتكاملة ؟ اتحطت كلمة الاتصال او التواصل عشان يدل على ان عملية الترويج هي عملية متبادلة و محتاجة لتواصل صحيح بين الشركات و الاشخاص المستهدفين و طبعا بعد ما الشركات تبعت رسايلها الترويجية لازم تحصل على استجابة و رأي من المستهدفين لتحسين جودة الرسايل الترويجية باستمرار.

Ostoria
Ostoria

يا ترى ايه اللي حصل عشان يتغير مصطلح الترويج للاتصالات التسويقية المتكاملة Integrated Marketing Communication؟
اتحطت كلمة الاتصال او التواصل عشان يدل على ان عملية الترويج هي عملية متبادلة و محتاجة لتواصل صحيح بين الشركات و الاشخاص المستهدفين و طبعا بعد ما الشركات تبعت رسايلها الترويجية لازم تحصل على استجابة و رأي من المستهدفين لتحسين جودة الرسايل الترويجية باستمرار. خطة الترويج المتكاملة
اما المتكاملة ليها سبب مهم ، و هو ان الشركات لازم تستعين بكل عناصر الترويج في نقس الوقت و بشكل متكامل لان الاعتماد على عنصر واحد مش منطقي ، كل عنصر ليه هدف منفصل و متكامل مع باقي العناصر كالتالي :

1- الاعلان Advertising :

هو العنصر الاشهر من عناصر الترويج و هدفه نشر اسم المنتج بشكل كبير وسط الشريحة المستهدفة.

2- العلاقات العامة او الاعلام Public Relation -Publicity :

هدفها نشر المصداقية عن المنتج من خلال بعض الادوات المتخصصة في تحقيق الهدف ده زي ادوات الهوية Coroparate Identity Materials زي الموقع الالكتروني و كروت العمل و الزي الخاص بالموظفين و المطبوعات الترويجية اللي بتركز على تعريف منتجات الشركة و تاريخها و مصدر قوتها في السوق.

3- البيع الشخصي Personal Selling :

و هدفه الاقناع عن طريق سرد قوي و مفصل عن فوايد المنتج للعميل و الرد على كل اعتراضاته و مخاوفه.

4- العروض الترويجية Sales Promotions :

و هدفها تنشيط عملية البيع و تحفيز المشتريين على اتخاذ خطوة الفعل و شراء المنتج.

هقولك على مثال عشان تفهم ليه لازم تستخدم كل عناصر الترويج بشكل متكامل ، هنفترض ان العدّاء “بولت” وهو يعتبر الاسرع بالعالم عايز يروج لنفسه مع افتراض ان مفيش حد يعرفه.

مشهد 1:
بينزل في الشارع و يوقف الناس و يقولهم انه اسرع راجل بالعالم ، و بعدين يروح لمنطقة تانية و يقول للناس نفس الكلام.. و هكذا.
كل الناس عرفت ان في راجل بيقول على نفسه انه اسرع راجل بالعالم ، الاعلان ده هدفه التعريف بالمنتج Brand Awareness.

مشهد 2 :
مايكل شوماخر المعروف بيجي ويأكد ان “بولت” اسرع راجل بالعالم ، دي اسمها العلاقات العامة هدفها اعطاء الناس مصداقية و ثقة عن المنتج.

مشهد 3:
راجل انيق بينزل مع “بولت” عشان يوضح للناس مزايا بولت و يوضح ازاي بيقطع مسافة كذا في زمن قياسي و انه اخد شهادات و جوايز و ارقام قياسية و كؤوس عالمية ، ده اسمه البيع الشخصي و هدفه الاقناع.

مشهد 4 :
جرّب بولت دلوقتي ولو مكانش سريع هعوضك او خد بولت و خد معاه جزمة Nike هدية ، هي دي عروض الترويج و هدفها تنشيط المبيعات.

مينفعش تبني خطة ترويجية قوية متكاملة بدون الاعتماد على العناصر الاربعة ، لان كل عنصر ليه هدف مختلف و تكميلي للعناصر التانية.
ممكن تضيف التسويق المباشر عشان يكون عنصر خامس بشكل منفصل و متكامل و هدفه التواصل و الحصول على ميزة السيطرة و التحكم في التعامل مع المشتري النهائي بدون اي وسيط يعيق عملية التواصل ، و الشركات تقدر انها تدّخل التسويق المباشر فعلا لعملية الترويج ، و من اشهر الامثلة على ده Mini Cooper اللي بتستخدم الترويج بشكل ممتاز ، لكنها بردو بتستخدم موقعها الالكتروني عشان تتواصل مع المشتريين بشكل مباشر و تخليهم يدخلوا الموقع يعدلوا بعض الحاجات و الاختيارات في سيارتهم المفضلة ، وياخدوا السيارة بشكل مباشر بدون اي وسيط ، ده يعتبر شكل من اشكال التسويق المباشر.

ممكن تظن ان الشركة لازم تكون كبيرة عشان تحقق معادلة تكامل العناصر الترويجية ، لكن ده مش صحيح فمهما كان حجمك تقدر تعمل الامر نفسه.
لما تقدم النهاردة مثلا كورس تدريبي لازم تعمل العناصر دي:

1- اعلانات لتعريف الشريحة المستهدفة بالتدريب (عمل نشر).
2- مقالات عن التدريب و ممكن تستعين بآراء اللي حضروا فبل كدا (خلق المصداقية) .
3- بيع شخصي عن طريق الاتصال بالراغبين انهم يحضروا التدريب و اقناعهم بمزايا الحضور و يحطوا رقم للتواصل (تحقيق هدف الاقناع).
4- عروض بيع و ترويج بوجود خصم خاص لو حجز بدري و كمان خصم للمجموعات (دفع المهتمين ياخدوا خطوة).

المثال ده بينلك انه مش ضروري تكون شركة عملاقة عشان تطبق كل عناصر الترويج ، كمان ممكن تستخدمها على نطاق اصغر . المهم انك تكون مقتنع بأهمية تكامل العناصر دي و تستعين بيهم كلهم حتى لو بنسب صغيرة.

Business concept of success.

السمع بيسبق الكلام